TUBUNGAN, ILOILO– Dakop ang lima ka mga lalaki sa banwa sang Tubungan matapos naaktuhan sang mga pulis nga nagasugal sa Barangay Adgao sa nasambit nga banwa.
Ang mga nagkaladakpan ang ginkilala nga sanday Godofredo Taganos, 61 anyos, Benedicto Tabigne 58 anyos, Rene Tamesin,41 anyos,Juan Tabladillo 68 anyos. Nolan Malba, 35 anyos, samtang ang nakapalagyo ang ginkilala nga si Ian Tabocoran 37 anyos.
Sa interview sang Bombo Radyo kay Police Staff Sergeant Ryan Bastonero, imbestigador sang Tubungan Municipal Police station nga sang nagresponde sila sa lugar, naaktuhan pa nila nga nagahampang ang amo nga mga persona, apang lima lang ang ila nadakpan samtang ang isa ang natigayun nga nakapalagyo.
Suno kay Bastonero, wala man sang kun ano man nga kahiwatan sa lugar suno kay Bastonero apang personal nga nagtipon-tipon ang mga nagkaladakpan agud nga maghampang.
Pahayag pa ni Bastonero, lakip sa recoveries amo ang P306 pesos nga pusta kag baraha.
Sa subong, yara na sa kustodiya sang Tubungan Municipal Police Station ang mga arestado kag magapangatubang sang kaso nga paglapas sa Presidential Decree No. 1602 ukon ang Anti Illegal Gambling Act.
