Gindala sa hospital ang lima ka senior citizen matapos nabungguan sang motorsiklo sa Barangay Lanag Sur, Tubungan, Iloilo subong nga gab-i.
Sa interview sang Bombo Radyo kay Police Captain Lunelyn Talamillo, Officer in Charge sang Tubungan Municipal Police Station, iya ginpahayag nga base sa imbistigasyon sang kapulisan, isa ka 19-anyos ang driver sang motorsiklo nga ginkilala kay Alyas Carl nga residente sang Guimbal Iloilo.
Ang mga biktima ang isa ka lalaki kag apat ka babayi nga lunsay residente sang Tubungan Iloilo.
Base sa impormasyon nga nakuha sang kapulisan, nagalakat ang mga biktima sa kilid sang dalan sang ini sila ang nabungguan, kag ginapahayag nga padulong ang mga ini sa balay sang ila kakilala nga nag taliwan, agud nga magpangadi.
Sa subong, ara sa Guimbal hospital ang mga biktima kag ginapaidalom sa pagbulong.
Ang driver sang motorsiklo ang ara subong sa Mother and Child Hospital sa banwa sang San Joaquin, tungod sa nakaagom man ini sang pilas sa ulo.
Text by: Bombo Ireca Pioquinto
