CAMP DELGADO, ILOILO CITY– Ginabanta 10 ka mga pulis ang ginpatawag sa Police Regional Office 6 matapos ang ginapahayag pagpahubog sa sulod sang Camp Jalandoni sang 2nd Iloilo Provincial Mobile Force Company sa Brgy. Zerrudo, Sara, Iloilo.
Ang nasambit nga insidente ang nagluntad pagkatapos sang ginhiwat nga awarding ceremony sang sportsfest kag pagkatapos, may fellowship program pa nga ginpatigayon.
Sa interview sang Bombo Radyo kay Police Regional Office 6 Spokesperson Police Lieutenant Colonel Joem Malong, iya ginpahayag nga nakalab-ot na kay Police Regional Office 6 Director Police Brigadier General Rene Pamuspusan ang mga laragway kun sa diin makita nga naga-inom ang mga pulis.
Suno kay Malong, gina imbestigaran na sa subong ang nasambit nga insidente kag kun mapamatud-an, kinahanglan nga manabat ang mga pulis nga katapo sang Reactionary Standby Support Force nga ginabug-usan sang mga patrolman nga augmentation force.
Ginpahayag ni Malong nga may yara sang standing order si Presidente Rodrigo Duterte sa mga pulis nga indi magpahubog ilabi na kun yara sa duty.
Hibaluon suno sa natungdan kun paano nakasulod sa kampo ang ilimnon ilabi na nga may liquor ban kag paghiwat sang sportsfest apisar sang quarantine kag may yara sang ginapatuman nga physical distancing.
Ang nasambit nga insidente ang ginkadismaya sang Police Regional Office 6 Director.
