DUMANGAS, ILOILO– Handa nga magbatun sang ila repatriated Overseas Filipino Workers ang banwa sang Dumangas.
Sa interview sang Bombo Radyo kay Dumangas Mayor Ronaldo ‘Onal’ Golez, iya ginpahayag nga nakahanda na ang quarantine facility sa ila banwa lakip na ang mga personnel nga maga-atinder sa kinahanglanon sang mga naka quarantine.
Suno kay Golez, nakabakal na sila sang folding beds, foams, moskitiro, electric fans kag iban pa nga mga kinahanglanon.
Pahayag pa ni Golez, nakakuha man sila sang clearance sa Department of Education nga mahimo gamitun ang mga eskwelahan bilang quarantine facility sa tion nga madamo ang mga OFW nga magapauli.
Lakip sa quarantine facility sang banwa amo ang ila evacuation center kag day care center.
Dugang pa niya, ang ila duha ka repatriates nga nagpauli sang nakaligad nga adlaw ang nakaquarantine sa isa ka hotel sa syudad sang Iloilo, kag kun makagwa na ang resulta sang ginpatigayun nga test ,mahimo nga pabalikun ang mga ini sa ila banwa.
Ginahulat pa nila suno sa alkalde ang resulta sang mga test results sang ila mga kasimanwa nga nagpauli kaupod sang second batch sang mga OFW.
Samtang, ginpahayag man sini nga makabig man niya nga COVID free na ang ila banwa, apang indi niya luyag nga mangin kampante kag sa baylo, kinahanglan nga padayunon ang pagsunod sa mga protocol, maggamit sang face mask, kag mag-obserba sang physical distancing.
