DUMANGAS, ILOILO- Nagapakig-angot sa tagsa ka mga Local Government Unit ang lokal nga pamunuan sang Dumangas, agud makapauli ang mga local strandees nga nagikan sa iban nga banwa.
Sa interview sang Bombo Radyo kay Dumangas Mayor Ronaldo Golez, iya ginpahayag nga ang mga strandees ang ginapasugat sa salakyan sang LGU agud mangin opisyal ang rekord sang pagpauli sang mga ini.
Suno kay Golez, kinahanglan nga may yara sang i-presenta nga quarantine pass nagikan sa munisipyo sang banwa, kag acceptance letter nga ang mga magabalik ang ginpahanugutan sang Local Government Unit.
Pahayag pa ni Golez, nagapahanugot sila nga makabalik ang mga na stranded nga residente, apang kinahanglan nga ang mga ini ang magsunod sa nagakaigo nga protocol.
Dugang pa sang natungdan, kun may yara sang mga na stranded nga pumuluyo sang kaiping nga mga kabanwahanan, ginadul-ong ini sang salakyan sang LGU agud mapasigurado nga insakto ang proseso nga ginpatigayun.
Samtang, sa pihak nga bahin ginpahayag man ni Dumangas Mayor Ronaldo Golez nga 100% na sila nga nakatapos sang ila pagpanghatag sang cash aid sa idalom sang Social Amelioration Program sang Department of Social Welfare and Development.
Pahayag sang alkalde, ginahatagan nila sang atensyon amo ang reklamo sang mga pumuluyo kaangay sang mga benipesyaryo nga kwalipikado apang wala nadala sa listahan sang mga makabatun sang cash aid, mga nagabatun sang pensyon apang nakakuha sang assistance, ang isyu sang ginapahayag pagtunga-tungan sang cash aid nga dapat batunon sang isa ka indibidwal.
