ILOILO CITY– Ginahitso na ni Iloilo City Mayor Jerry Treñas ang iya executive order may kaangtanan sa pagpaidalom sa syudad sang Iloilo, sa General Community Quarantine.
Sa nasambit nga executive order, igaplastar kun ano ang mga dapat kag indi dapat himuon sa idalom sang GCQ, lakip na ang mga establisimento nga pagabuksan, kag kun ano ang mga pagsulundan.
Sa interview sang Bombo Radyo kay Iloilo City Mayor Jerry Treñas, iya ginpahayag nga bangud yara na sa General Community quarantine ang bug-os nga isla sang Panay, wala na sang ipatuman nga border restrictions.
Suno kay Treñas, indi na kinahanglan nga magpakita pa sang quarantine pass ang mga pumuluyo sa tion nga magwa sa ila panimalay.
Kun may yara sang mga repatriated Overseas Filipino Workers kag mga Local Strandees nga magapauli sa syudad , kinahanglan nga magsunod ang mga ini sa nagakaigo nga protocol kaangay sang mandatory 14 day quarantine kag swab test.
Pahanugutan lang ang mga passenger ships nga magdungka sa syudad, kun ang mga ini ang nagadala sang mga OFW’s, kag Local Strandees.
Pahayag pa sang alkalde, apisar wala na sang quarantine pass, kinahanglan sa gihapon nga maggamit sang face mask, kag mag-obserba sang physical distancing.
