ILOILO CITY – Madamo ang estilo sa pagluto sang Adobo nga ginakabig nga comfort food sang mga Ilonggo.
Pila lamang sa mga mahapos kag madali nga lutuon amo ang Crispy kag Mexican Adobo.
Sa Good Morning Philippines Program, ginpatpat ni Christine Perez, tag-iya sang Dad’s 60’s Diner, kun paano lutuon ang nasambit nga mga putahe.
Sa pagluto, lakip sa mga ingredients amo ang manok, baboy, ahos, oil, asin, patis, langgaw, Chili con carne kag tomato sauce.
Sa pagluto sang Crispy Adobo, mas maayo kun painiton anay sa kalaha ang mantika antes ibutang ang madamo nga ahos, ibutang ang ginhiwa nga manok kag pagkaligad sang 10 ka minuto, ibutang ang asin kag patis.
Samtang ginaluto ang Chicken adobo, mahimo naman nga umpisahan ang pagluto sang lechon kawali kag mas makapaayo nga pilion ang tambok sang baboy.
Ini ang lutuon sa madamo nga oil kag pagkatapos sang pulo ka minuto, mahimo na nga patulu-on ang ginluto nga lechon kawali agud nga isimpon sa Chicken Adobo.
Mas makapadugang sa gana sa pagkaon ang plating kag ang paggmit sang puti kag dako nga sahi sang pinggan.
Para naman sa Mexican Adobo, i-mix ang ginluto nga Chicken Adobo, Chili con carne kag tomato sauce kag ini ang lutuon sang 10 ka minutos.
Ang kinalain lamang sang Mexican food amo nga may yara ini sang ingredients nga makahang depende sa luyag nga sabor.
Kun Mexican food ang ginaserbe, mas makapaayo nga maggamit sang maduagon nga pinggan.
