ILOILO – Kinahnaglan nga may yara sang price tag ang tanan nga ginabaligya sa physical store man ukon sa online.
Ini ang may kaangtanan sa Fair Trade Law kag Price Tag Law nga ginapatuman sa tanan nga produkto nga yara sa sakop sang Department of Trade and Industry.
Sa interview sang Bombo Radyo kay Felisa Judith Degala, Provincial Director sang Department of Trade and Industry – Iloilo, iya ginpahayag nga kinahanglan nga mangin hayag ang tanan nga seller paagi sa pagbutang sang price tag sa ginabaligya nga produkto.
Suno kay Degala, katuyu-an sini nga mahibalu-an kun bala ginasunod ang Suggested Retail Price nga ginpaguwa sang Department of Trade and Industry.
Ginpahayag ni Degala nga kalabanan sa mga may violation sa nasambit nga mga layi amo ang online sellers nga wala nagabutang sang presyo sa ginabaligya nga produkto.
Ginhalimbawa sang natungdan amo ang ‘PM Sent’ ukon ginapaagi sa Private Message ang transaksyon kag wala nahibalu-an sang iban kun pila gid ang presyo sang produkto.
Gin-athag sang natungdan nga humalin sang Styembre 30, 2019, wala pa sang may ginpaguwa nga Suggested Retail Price ang Department of Trade and Industry.
