ILOILO CITY – Wala sang may mahimo ang 20 anyos nga anak kundi saluon ang responsibilidad nga ginbilin sang iya nagtaliwan nga amay.
Sa Good Morning Philippines program, ginpahayag ni Joel Dadivas, 2nd year Tourism Management student, nga nagdaku siya sa pigado apang mapinalanggaon nga pamilya.
Suno kay Dadivas, indi na bag-o sa iya ang makabati sang pagpangyaguta kag diskriminasyon bangud sa mga sirkumstansya sa iya kabuhi kag indi malikawan nga kun kaisa, nagabatyag man siya sang kalain sang buot.
Ginpahayag ni Dadivas nga wala siya sang may mahimo kundi magbakas sa pag-eskwela agud nga mapasadya ang iya ginikanan paagi sa pagpangibabaw sa patag sang academics kag extra co-curricular activities.
Sa maayo nga palad, nahatagan si Dadivas sang kahigayunan nga maka-eskwela sa isa ka international school sa syudad sang Iloilo kag bilang balos, mas ginbakasan niya ang pag-eskwela tubtub nakatapos sa High School bilang Valedictorian.
Sa pihak sang pagsakripisyo, ginpahayag ni Dadivas nga napili-an siya bilang tiglawas sang Pilipinas sa Students for the Advancement of Global Entrepreneurship nga ginpatigayon sa Metro Manila.
Sa lamharon nga edad, ginpahayag sang natungdan nga madamo siya sang handum para sa iya pamilya kasubong sang pagpakay-o sang nagatulo nga atop rason nga kun mag-ulan, kinahanglan nila nga magpamayong sa sulod sang balay.
Ang nasambit nga handum ang kasubong nga nautod sang nagbusong ang iya tatlo ka utod nga mga babayi nga lunsay naga-eskwela pa lang kag nagdugang pa gid sa pagpanghangkat suno kay Dadivas ang kamatayon sang iya amay nga sadto anay driver kag amo ang numero 1 nga nagasuporta sa iya.
Bilang solo nga lalaki sa ila pamilya, ginpahayag ni Dadivas nga wala siya sang may mahimo kundi saluon ang katungdanan sang nagtaliwan nga amay.
Agud nga makabulig, nagabaton siya sang sideline kasubong sang tutorial, pagserbe nga host sa mga events kag pagtudlo sang Binalaybay ukon ano man nga sahi sang matarong nga trabaho.
Nakabulig man sa iya ang pagserbe bilang Sangguniang Kabataan Chairman sa Brgy. Boulevard, Molo sa syudad sang Iloilo.
