ILOILO CITY- Ginapabugal sang iya mga anak bilang isa ka maayo nga amay si Iloilo City Mayor Jerry Treñas.
Sa Good Morning Philippines Program, ginpahayag ni Geronimo Efrain (Gerry) Treñas Jr., nga sini nga Fathers Day, ginapabugal niya ang iya amay bangud apisar masako ini sa iya katungdanan bilang alkalde sang syudad, ginatinguhaan sini nga matungdan ang ila tagsa ka mga kinahanglanon.
Suno kay Treñas, kun makit-an sang ila amay nga may yara sila sang kapasidad agud himuon ang isa ka bagay nga makabulig sa ila agud mangin isa ka maayo nga indibidwal, ginahatagan sila sang nagakaigo nga inspirasyon sini.
Suno sa natungdan, sang nareyalisar niya nga indi para sa iya ang pagtuon sang law, naghibi ang iya amay, apang naintindihan man ini bangud kaangay niya, naagyan man sang alkalde ang kaangay nga sitwasyon.
Ginpahayag pa niya nga mahilig mag-joke ukon maglango-lango ang alkalde, kag normal man ini nga mag-istorya sa ila.
Nagadala man suno sa iya sang mais, mani, ukon balut ang iya amay sa tion nga magpauli ini gikan sa trabaho.
Paborito man suno sa iya sang iya amay nga alkalde ang sud-an nga lechon, apang may kaupod ini nga laswa kag isda.
Samtang naghatag man sang mensahi para sa iya amay subong nga Father’Ss day si Geronimo Efrain “Gerry” Treñas Jr.
Suno saiya, nagapasalamat siya sa tanan nga suporta kag pagpalangga nga ginhatag sang alkalde sa ila nga mag-ululutod.
Pahayag pa niya, padayunon lang ni Mayor Treñas ang pag-alagad sa syudad kag yara lang sila nga handa magbulig, kag maghatag sang suporta.
