SAN MIGUEL, JORDAN, GUIMARAS– Padayun nga ginapasangkad sang isa ka Ati Community ang ila programa agud tudluan sang ila native nga kultura ang mga ulihing tubo nga mga ati sa Sitio Kati-Kati Jordan, Guimaras.
Sa interview sang Bombo Radyo kay Evem Ganila, isa ka registered nurse kag cultural worker nga may yara sang programa ang National Commission for Culture and the Arts sa ila lugar, nga may tinutuyo nga buhion kag itudlo sa ulihing tubo ang kultura snag mga ati, nga nagaka-amat-amat na dula samtang nagamoderno na ang panahon.
Suno kay Ganila, sa School of Living Tradition Guimaras Center, may yara sila snag cultural masters nga nagapatigayun sang klase sa mga kabataan kag nagatudlo sang kultura, musika kag saot, Art, kag tradisyunal nga lenggwahe.
Sa pagpatigayun sang klase suno sa iya, strikto man ang ginapatuman nga protocol kaangay sang physical distancing kag paggamit sang facemask.
Ginatudluan suno kay Ganila ang mga iloy nga magpang rara samtang ang mga tatay naman ang nagatuon sang carving nga mahimo magamit bilang livelihood.
Sa subong suno sa natungdan, plano man nila nga magpublish sang mga libro nga maggamit sang mga ulihing tubo agud matun-an kag mahibaluan kun ano ka manami ang tradisyon sang mga ati.
