ILOILO CITY– Handum kag tinutuyo sang grupo nga gintukod sang mga pamatan- on nga matib-ong ang mental health awareness sa komunidad.
Sa interview sang Bombo Radyo kay Addyvel Myles Toledo Aldon, incoming grade 12 student sang University of the Philippines High School, founder kag Presidente sang grupo nga Hiwaraya, iya ginpahayag nga isa sa mga nagtulod sa iya agud tukuron ang grupo, amo nga mapahibalo sa tanan ang importansya sang mental health bilang isa ka aspeto sang pagpangabuhi.
Suno kay Aldon, luyag nila ipahibalo sa mga pamatan-on nga mahimo sila makakuha sang mental health support sa komunidad, agud mahatagan sang kaathagan sa ila problema ukon palamangkutanon.
Lakip sa ila programa suno sa iya, amo ang pagpatigayun sang diskusyon online may kaangtanan sa mental health, kag ang palaabuton nga Hiwaga project sa bulan sang Hulyo, sa diin may webinars, kag paghimo sang mga modules nga mahimo magamit sa tagsa ka adlaw.
Gin-agda man sang natungdan ang mga pumuluyo nga ugyunan ang ila Hiwaga project kag kun nagakinahanglan sang bulig sa mental health nga aspeto magmessage lang sa ila facebook page nga Hiwaraya, agud makakuha sang bulig.
Samtang, sa isyu naman sang overthinking nga kalabanan nagakatabo sa mga kabataan, nagpanugyan man si Aldon nga wala sang problema kun mag-overthink sang panalagsa, apang nagakadapat nga indi ini dapat paghimuon sa halos adlaw-adlaw.
Suno kay Aldon, kun sige-sige ang sobra-sobra nga pagpanumdum sang mga bagay-bagay mahimo mahatag ini sang negatibo nga epekto sa mental nga aspeto.
Pahayag pa niya, agud makalikaw sa negatibo nga mga bagay, dapat hatagan sang pokus ang kaugalingon kag mag-isip sang mga butang sa diin mas makahatag sang kaayuhan sa imo kag sa iban pa nga tawo sa palibot.
