ILOILO CITY – Maga-isyu na sang citation ticket ang mga personnel sang Public Safety and Transportation Management Office (PSTMO) sa mga tawo sa Iloilo Terminal Market nga padayon nga nagalapas sa health protocol.
Sa interview sang Bombo Radyo kay Melvin Sorongon, opisyal sang nasambit nga pamunuan nga assigned sa nasambit nga merkado, iya ginpahayag nga wala man sila nagkulang sa pagpahanumdom sa publiko sa pagsuksok sang face mask kag pagsunod sa physical distancing.
Wala pa subong sang napapanaugan sang multa sa Iloilo Terminal Market apang ang compliance team suno kay Sorongon ang nag-umpisa na sa ila operasyon sa bug-os nga syudad.
Magluwas sa otoridad nga naka-deploy sa entrance sang merkado, ginahingyo man ang mga market vendors nga sila na mismo ang mag-remind sa ila mga customer nga indi magpasaway kag sa baylo, magsunod sa ginapatuman nga minimum health standards.
