PASSI, ILOILO – Tubtob subong nga adlaw, Hulyo 3, ang pagpahanugot sa mga returning residents nagikan sa iban nga probinsya sa Western Visayas nga makasulod sa border sang probinsya sang Iloilo kag makapauli sa Iloilo Province, Iloilo City, kag Guimaras.
Sa interview sang Bombo Radyo kay Passi City Mayor Stephen Palmares, iya ginpahayag nga hugot ang pagbantay sa border control point sa syudad sang Passi agud ma-monitor ang mga returning residents.
Valid ID lang suno kay Palmares ang kinahanglan.
Nagpaandam man si Palmares nga paglampas sang Hulyo 3, kabigon na nga locally stranded individuals (LSIs) ang mga returning residents kag kinahanglan ipakita ang masunod:
-Medical Certificate halin sa originating/sending local government unit;
-Travel Authority halin sa Chief of Police ukon higher command ukon Travel Authority nga gin-isyu sang gobernador sa iya nasakupan nga constituents nga may hugot nga koordinasyon sa Philippine National Police (PNP); kag
– Prior coordination kag clearance sa provincial kag concerned municipal governments
Kaangay man nga mga requirements ang ipakita sang mga residente nga wala nalakip sa exemptions sa Executive Order ni Iloilo Governor Arthur Defensor Jr. apang nagapamilit pa nga maka-gwa sa border sang Iloilo.
SA FOOD DELIVERIES
Mahimo man nga makasulod kag gwa ang food deliveries sa mga probinsya sa Western Visayas apang limitado lamang sa may rehistro kag nagakaigu nga dokumento.
Sa bahin naman sang mga cargo deliveries nga nagikan sa Batangas kag Manila, ginpahayag ni Palmares nga daw kaangay nga “pasa-pasa” sa kada local government unit ang pagbantay agud mapat-od nga wala na nagadulog ang salakyan kag wala nagapanaug ang mga pahinanante kag driver.
Suno kay Palmares, ginadul-ong sang Passi City PNP ang cargo truck sa border sang Dueñas, masunod nga buslan sang Dueñas padulong sang Dingle, masunod nga buslan sang Pototan kag nagapadayon ang amo nga proseso tubton makaabot sa destinasyon.
