GUIMARAS – Labi pa nga nagalapta ang halit tuga sang langis nga nagtagas gikan sa power barge sang AC Energy Corporation sa Zone 3, Bo. Obrero, Lapuz, Iloilo City.
Sa Brgy. Taminla, Buenavista, Guimaras, ginareklamo sang mga pumuluyo ang nagalala nga baho sang langis kag ang pagtapik sini sa fish net sang mga mangingisda.
Sa exclusive interview sang Bombo Radyo kay Brgy. Kagawad Dante Ferrer sang nasambit nga lugar, iya ginpahayag nga kaina sang aga una nga natalupangdan nga naglab-ot na sa ila barangay ang oil spill.
Ginabanta 200 ka mga pumuluyo ang mangin apektado sa amo nga barangay kun padayon pa nga maglapta ang langis ilabi na bangud pagpangisda ang pangabuhian sang kalabanan.
May kaangtanan diri, naghimo ang mga barangay officials sang improvised spill boom gamit ang lukay sang niyog kag ramay sang saging nga ginhigot sa kawayan kag ginpalutaw sa tubig.
Ginahingyo man sang mga opisyal sang barangay ang dugang nga bulig agud madasig nga malikop sang spill boom ang ginabanta duha ka kilometro nga tubig nga nasakupan sang Barangay Taminla.
Suno kay Punong Barangay Jerome Crudo, nagabuligay ang mga opisyal kag barangay tanod sa paghimo sang improvised spill boom apang sa subong, tunga sa kilometro pa lang ang kalabugon sang ila nahimo.
Ginatinguhaan man sang natungdan nga makig-angot sa Municipal Disaster Risk Reduction and Management Office (MDRRMO) kag sa local government unit (LGU) agud gilayon nga matapna ang paglapta sang bunker fuel.
Samtang, sa Barangay Ingore sa distrito sang La Paz, ginkumpirma ni Punong Barangay Jonathan Jalandoni nga apektado man sang oil spill ang kalalawran nga sakop sang ila barangay.
Suno kay Jalandoni, wala pa sila sang nahimo nga improvised spill boom bangud nagahulat man sila sang mandu kag bulig nagikan sa concerned agencies.
Sa interview sang Bombo Radyo kay Vicente Guzman, Barangay Tanod sa amo nga lugar, iya ginpahayag nga nagtapik na ang langis sa mangroves kag sa pukot sang mga mangingisda.
Nagsulod naman ang bunker fuel sa wala na ginagamit nga mga fish pond kag ginakahangaw-an nga labi pa nga magalapad.
