DUMANGAS — Nagapangabay ang local government unit (LGU) sang Dumangas, Iloilo sang dugang nga bulig halin sa mga pumuluyo agud makahimo sang improvised spill boom.
Ini matapos nakalab-ot na sa kalalawran sang nasambit nga banwa ang oil spill tuga sang paglupok sang power barge sang AC Energy Corporation sa Bo. Obrero, Lapuz, Iloilo City.
Sa interview sang Bombo Rdayo kay Mayor Ronaldo “Onal” Golez, iya ginpahayag nga apektado na sang nagalapta nga bunker fuel ang mga botelya, bato, kag fish net sang mga mangingisda.
Suno sa alkalde, ginaprayoridad subong ang pagpalawig pa sang spill boom bangud ginakahangaw-an nga linibo ka ektarya sang punungan ang maapektuhan kun indi gilayon mapunggan ang langis.
May kaangtanan diri, nagapanawagan ang opisyal sa mga taga-banwa sang Dumangas nga magdonar sang daan nga mga panapton, sako, ukon anuman nga mahimo iputos sa kawayan agud magserbe nga floater ukon improvised spill boom.
