ILOILO – Nagapabilin sa 389 ang numero sang kumpirmado nga kaso sang coronavirus disease 2019 (COVID-19) sa Western Visayas.
Ini matapos nga wala sang narecord nga panibag-o nga kaso ang Department of Health (DOH) Region 6 as of July 6.
Nagsaka naman sa 152 ang naka-recover matapos madugangan sang duha nga amo sanday:
Patient No. 134 – 35 anyos nga lalaki, taga-Cauayan, Negros Occidental
Patient No. 156 – 30 anyos nga lalaki, taga-Hinobaan, Negros Occidental
Ang duha ka bag-o nga recoveries ang lunsay locally stranded individuals (LSIs).
Kun pahat-pahaton ang kabug-usan nga COVID-19 cases sa rehiyon: ang Aklan ang may 6 ka COVID-19 cases, Antique ang may 15, Capiz ang may 6, Iloilo Province ang may 40, Negros Occidental ang may 5, Bacolod City ang may 11, Iloilo City ang may 35 kag 271 sa mga repatriates.
Samtang padayon naman ang contact tracing sa distrito sang La Paz matapos nagpositibo sa COVID-19 ang personnel sang Technical Education and Skills Development Authority (TESDA) Region VI.
Suno kay Dr. Glen Alonsabe, COVID-19 spokesperson kag pinuno sang Regional Epidemiology and Surveillance Unit sang Department of Health Region 6, indi pa sa gihapon matumod sa subong kun paano nalatnan sang virus ang pasyente nga si Patient No. 359, 53 anyos nga lalaki.
Ginapahayag nga antes nag-abot ang resulta sang confirmatory test, naka-report pa sa opisina ang amo nga lalaki.
Sa subong, naka-lockdown ang amo nga pamunuan kag ginpaidalom na sa quarantine ang tanan nga close contacts samtang natalana man nga ipaidalom sa COVID-19 testing.
Gin-athag man sang natungdan nga sa subong, indi pa ma-establisar kun paano na-infect sang COVID-19 ang doctor sa Barbaza, Antique kag amo man sanday Patient No. 276, 14-anyos nga lalaki nga taga-Dumangas, Iloilo kag Patient No. 336, 52-anyos nga lalaki nga taga-Sta. Barbara, Iloilo.
