MAASIN – Wala pa sa gihapon nadakpan ang suspek nga nagbuno-patay sa iya live-in partner sa Brgy. Magsaysay, Maasin, Iloilo.
Matandaan nga natabo ang insidente sang Hulyo 5 sang ginhatok-hatok sang buno ni Mark Erwin Almaquer ang biktima nga si Jessa Marquillencia bangud sang ginapahayag pagpangimon.
Una naman nga ginpahayag nga bag-o lang natapos sang biktima ang iya 14-day mandatory quarantine sang nagbalik ini nagikan sa Metro Manila.
Suno kay PSSG. Sane Roto, imbestigador sang Maasin Police Station, gin-transaksyon sang suspek ang biktima nga magkit-anay agud ihatag ang ila anak apang sang nagkit-anay na, wala na napunggan ang kaakig kag gilayon nga ginbuno si Marquillencia.
Bangud sini, ginpasaka ang kaso nga murder batok kay Almaquer.
Sa interview sang Bombo Radyo kay Pol. Maj. Fernand Limbungan, iya ginpahayag nga nalagyo ang suspek sa nabukid nga bahin sa banwa sang Alimodian kag natumod naman sang kapulisan kun diin ini nga barangay nagatinir.
Gin-ako ni Limbungan nga indi madali-dali sa pagsulod ang lugar bangud sa presensya sang New People’s Army kag indi sunado sang kapulisan ang tanan nga alagyan.
Bangud sini, nagpangayo sang bulig ang Maasin Police Station sa Alimodian PNP, Citizen Armed Force Geographical Unit (CAFGU), kag mga opisyal sang amo nga barangay agud madasig nga maaresto ang suspek.
