ILOILO CITY – Kulang ang pagpaninguha sang iban nga punong barangay sa syudad sang Iloilo sa pagpatuman sang minimum public health standards bilang taming batok sa coronavirus disease 2019 (COVID-19).
Sa interview sang Bombo Radyo kay Fernando Jose ‘Boyet’ Rico, executive assistant for Barangay Affairs, iya ginpahayag nga may mga salawayon gid nga punong barangay nga wala man nagasuksok sang face mask kag wala nagasunod sa physical distancing.
Ini ang naobserbahan sang natungdan sa paglibot sang compliance team sa syudad kun sa diin kapin 70% na sa 180 ka kabarangayan sa syudad ang natigayon nga makadtuan.
Suno kay Rico, bangud sa indi maayo nga ehemplo, wala man nagasunod ang mga pumuluyo.
Apisar sini nga kakulangan, gindayaw ni Rico ang mga mall kag establisemento-komersyal nga may kompleto nga sanitation materials para sa mga kustomer.
“SA NAGA-PARK SANG ILIGAL”
Sa bahin naman sang pagbalik sang mga illegal structures sa madamo nga dalanon sa syudad, ginpahayag ni Rico nga temporaryo anay nga nauntat ang clearing operations.
Suno sa opisyal, ini ang kasunod man sang mandu nagikan sa Department of the Interior and Local Government (DILG) nga ipaiway anay ang pagpanghawan sang mga sablag sa dalan kag tutukan lang anay ang COVID-19 pandemic.
Samtang, gintudlo naman sang opisyal sa Public Safety and Transportation Management Office (PSTMO) ang responsibilidad sa pagsaway sa mga driver nga naga-illegal park sang ila salakyan.
