ANTIQUE – Ginahulat gid sang mga locally stranded individuals sang Antique ang resulta sang reverse transcription polymerase chain reaction (RT-PCR) test antes mag-gwa sa quarantine facility.
Sa interview sang Bombo Radyo kay Antique Provincial Health Officer Dr. Leoncio Abiera Jr., iya ginpahayag nga ini ang nakasugtan sang mga local government unit officials sa amo nga probinsya apisar may yara sang abiso ang Department of Health nga mahimo na paggwaon sa pasilidad ang mga asymptomatic nga pasyente kun matapos na ang quarantine period.
Suno kay Abiera, umpisa sang ginpatigayon ang repatriation sang OFWs kag LSIs, nangin istrikto ang pagsulundan sang Antique nga magpaidalom sa 14-day mandatory facility quarantine ang tanan.
Ginapahanugutan lang suno sa natungdan ang home quarantine para sa mga tawo nga may comorbidity kag may balay nga nakapasar sa requirement sang Inter-Agency Task Force para sa home quarantine.
Sa 18 ka banwa sa Antique, kalabanan sa pasilidad nga ginagamit amo ang mga eskwelahan apang may yara man sang mga banwa nga naggamit sang ila housing units kag resort.
Nahibaluan nga ang Antique ang may pinakamataas nga numero sang ginpabalik nga locally stranded individuals kun sa diin naglab-ot na ini sa 5, 777.
Sa sini nga numero, santo sa pinakaulihi nga record sang pamunuan, 189 ka LSIs kag 202 ka OFWs ang nagapabilin sa pasilidad.
