ILOILO – Ginsigurado sang AC Energy nga natinluan sang maayo ang coastal areas sa Lapuz, Iloilo City kun sa diin nahamtang ang balay sang mga residente nga apektado sang oil spill.
Sa interview sang Bombo Radyo kay Gabino Ramon Mejia, pinuno sang Plant Operations sang AC Energy, iya ginpahayag nga ini ang rason kun ngaa amat-amat lang ang pagpapauli sa mga pamilya nga una na nga ginpatinir sa mga hotel sa syudad.
Suno kay Mejia, apisar wala sang kahilabtanan ang naglupok nga power barge sang AC Energy sa paglapta sang basura sa palibot sang balay sang mga tawo, gin-ulayhon na lang sang kompaniya ang mano-mano nga pagpaninlo.
Sa latest record sang City Social Welfare and Development Office, sa 308 ka pamilya nga gin-evacuate sa hotel, 179 na ang nakapauli sa ila balay; buot silingon, 129 pa ka mga pamilya ang yara gihapon nagatinir sa hotel.
Sa bahin naman sang water and air quality, ginpahayag ni Mejia nga padayon ang ila monitoring kag ini ang kabahin man sang ila environmental management plan nga ginpasa sa Department of Environment and Natural Resources – Environmental Management Bureau.
Sa subong suno kay Mejia, amat-amat na nga nagabalik sa normal ang kalidad sang tubig base sa ila obserbasyon kag sa obserbasyon sang biologists sang Bureau of Fisheries and Aquatic Resources (BFAR) Region VI.
Sa bahin naman sang kompensasyon nga ginahingyo para sa mga pumuluyo nga apektado sang oil spill, ginpahayag ni Mejia nga wala nagabag-o ang panindugan sang AC Energy.
Suno kay Mejia, bukas ang pamunuan sa paghatag sang ayuda apang ginahulat pa nila ang parameters nga ihatag sang Iloilo City Government agud mahibaluan kun pila ang apektado nga trabahador kag pamilya.
Ginpasalig sang natungdan ang publiko sa transparency sa imbestigasyon kag recovery operation matapos ang halit nga natuga sang ila naglupok nga power barge.
