ILOILO CITY – Bukas ang syudad sang Iloilo sa pagbaton sang dugang nga batch sang locally stranded individuals halin sa nanuhay-tuhay nga lugar sa Pilipinas.
Suno kay Iloilo City Mayor Jerry Treñas, may 475 pa ka bakante nga beds sa mga quarantine facilities sa syudad lakip na ang Jubillee Hall kag mga eskwelahan.
Magluwas diri, ginasigurado man sang Iloilo City Government nga wala sang magagutok nga pasilidad, rason nga may ginhanda pa gid nga dugang nga 500 beds.
Dapat suno sa alkalde nga buligan ang mga locally stranded individuals nga makabalik sa ila balay sa syudad sang Iloilo ilabi na bangud madamo sa ila ang wala na sang kwarta sa ila lugar nga ginatiniran subong.
Ginpasalamatan man ni Mayor Treñas ang presidential management staff nga amo ang nag-proseso agud makapauli ang ginabanta 70 ka locally stranded individuals halin sa Iloilo padulong sa Metro Manila.
May yara man sang allowance nga ginhatag ang Department of Social Wefare and Development Office sa nasambit nga mga LSIs agud may yara sila sang gastuhon kun mag-abot sa ila tagsa ka lugar.
Nagapangabay man ang alkade kay Presidente Rodrigo Duterte agud madugangan pa ang locally stranded individuals nga makabalik sa Iloilo.
