ILOILO – Plano ni Dumangas Mayor Ronaldo “Onal” Golez nga ipalab-ot sa Iloilo Provincial Government ang reklamo sang mga pumuluyo sa malubog nga tubig sa nasambit nga banwa.
Ang ginapahayag malubog nga tubig nga ginasuplay sang Dumangas-Barotac Nuevo Water District ang binulan na nga ginaproblema sang mga residente sang 45 ka kabaranggayan sa Dumangas.
Sa interview sang Bombo Radyo kay Mayor Golez, iya ginpahayag nga ginpatawag naman sang iya opisina ang nasambit nga water district kag sa kada pagsinapol, ginapasalig man sang mga personnel nga kadtuan nila ang mga balay kag kay-uhon ang problema apang sulit-sulit lang ang nagakatabo bangud tubtob subong, malubog man sa gihapon ang tubig.
Gintugyan man sang alkalde ang amo nga reklamo sa Sangguniang Bayan para sa imbestigasyon kag subong, ginahulat na lang ang rekomendasyon sang nga Sangguniang Bayan Members.
Apisar indi pribado ang Dumangas-Barotac Nuevo Water District bangud napaidalom ini sa Local Water Utilities Administration, ginpahayag ni Golez nga daw kaangay nga wala sang poder ang local government unit sa Dumangas gani ipasaka niya ang isyu kay Iloilo Arthur Defensor Jr. nga amo man ang naga-appoint sa Board of Directors sa amo nga water district.
