ILOILO – Mas mangin madasig kag matawhay ang pagsugat sa mga locally stranded individuals kun may yara sang koordinasyon ang ila pag-abot.
Sa interview sang Bombo Radyo kay Anthony Selorio, focal person para sa mga locally stranded individuals kag returning overseas Filipos sa Miag-ao, iya ginpahayag nga makabulig ang pagpakig-angot sa local government unit 2 ukon 3 ka adlaw antes ang byahe agud malikawan ang pagsalangisag pag-abot sa Iloilo.
Suno kay Selorio, magluwas sa pagtsekyar sang dokumento, ginaproseso pa sang local government unit ang pagsulod sang mga LSIs sa quarantine facility.
Dugang pa suno sa opisyal, kinahanglan man nga i-schedule ang paggamit sang ambulansya nga may iban man nga katungdanan magluwas sa pagsugat sa mga LSIs kag returning overseas Filipino workers.
Ginpahayag ni Selorio nga wala gid sang problema sa ila bisan sa kagab-ihon ang pagsugat sa mga LSIs sa kondisyon nga napahibalo lang sila sang maayo.
