ILOILO – Pahanumdom lang kag indi training ang kinahanglan sang mga kapulisan nga maga-upod sa Oplan Kalinga program ukon house-to-house search sa mga asymptomatic nga COVID-19 patients nga kinahanglan dal-on sa quarantine facilities.
Suno kay PBGen. Rene Pamuspusan, director sang Police Regional Office VI, “security and assistance” lang ang ihatag sang Philippine National Police (PNP) sa amo nga programa gani indi na kinahanglan pa ang maid-id nga paghanas.
Ini nga katungdanan sang kapulisan ang gin-athag man ni PNP Chief General Archie Gamboa sang nagbisita siya sa Police Regional Office 6 sang Mierkules, Hulyo 15.
Ang nakadesignar nga health officials sa mga local government unit (LGU) suno kay Pamuspusan amo ang may mayor nga katungdanan sa patigayunon nga pagpamalay-balay.
Mahimo suno kay Pamuspusan nga pahanumdumon lang ang kapulisan sa mga health protocol nga pagasundon agud malikawan man ang dugang paglapta sang COVID-19 infection.
