Tun-an sang maayo sang Senado ang ginaduso sang League of Municipalities of the Philippines (LMP) nga Charter Change ukon pag-ilis sang Konstitusyon.
Sa interview sang Bombo Radyo kay Sen. Francis “Kiko” Pangilinan, chairman sang Senate Committee on Constitutional Amendments, iya ginpahayag nga subong nga may COVID-19 pandemic, dapat gid balansehon kun ano ang hatagan sang prayoridad.
Suno kay Pangilinan, madamo na sa mga senador ang nagapahayag nga indi ini ang tion agud iduso ang Charter Change.
Indi man kinahanglan suno sa senador nga islan gid ang Konstitusyon agud maduso ang Mandanas ruling kun sa diin nakasaad nga kinahanglan nga national taxes ang halinan sang Internal Revenue Allotment (IRA) sang local government units kag indi lang limitado sa mga makolekta sang Bureau of Internal Revenue (BIR).
Tun-an man sang senado ang isa pa ka ginaduso sang League of Municipalities of the Philippines nga pag-lift sang restrictions sa foreign investments sa mga negosyo sa Pilipinas nga subong limitado lamang sa mga Pinoy.
Handa man si Sen. Pangilinan nga mag-resign sa iya chairmanship sa Senate Committee on Constitutional Amendments kun ini ang desisyon sang Senate leadership.
Apang gin-athag sang senador nga indi siya magpanaug sa pwesto bangud lamang sa pagpakamalaot sang mga ginbayaran nga trolls sa social media.
Nahibaluan nga naangkon ni Sen. Pangilinan ang madamo nga kritisismo matapos gintawag nga ‘out of this world’ ang argumento nga Charter Change ang makabulig solbar sang problema sa COVID-19 sa Pilipinas.
