Magasentro ang State of the City Address (SOCA) ni Iloilo City Mayor Jerry Treñas sa mga nahimo sang Iloilo City Goverment sa sulod sang 12 ka bulan.
Ini agud makit-an sang mga pumuluyo ang nangin dalagan sang administrasyon kag mangin basehan kun maayo man ini ukon may dapat pa pauswagon.
Sa interview sang Bombo Radyo kay Treñas, iya ginpahayag nga madamo man ang wala napatuman nga plano umpisa sang nag-abot ang COVID-19 pademic sa syudad.
“IBAN PA NGA MGA PLANO”
Sa pihak sini, nagpasalig ang alkalde nga hatagan sang separado nga tion sa masunod nga semana agud hambalan ang iban nga plano sang Iloilo City Government.
Lakip na diri ang development sang pagtukod sang COVID-19 laboratory sa Brgy. San Pedro, Molo kag pagtukod sang evacuation center para sa mga apektado sang magaluntad nga sunog sa syudad.
Pagahambalan man sa sunod nga mga pagsinapol ang pagpakay-o sa public plazas, pagpahamtang sang mga washing areas sa mga eskwelahan, kag pagpabaskog sang internet capacity.
Suno kay Treñas, nagahanda man ang Iloilo City Government para sa Special Education Fund ukon pondo para sa mga papel nga mahimo gamiton ilabi na bangud maga-focus sa modular learning ang School Year 2020-2021.
