ILOILO CITY – Indi sala sang mga opisyal sang barangay kun ngaa may mga pagsalangisag nga natabo sa pag-umpisa sang tagtaganay sang ikaduha nga hugnat sang Social Amelioration Program cash aid sa syudad sang Iloilo.
Sa interview sang Bombo Radyo kay Punong Barangay Roberto Niño sang Calumpang, Molo, tagpamaba sang Liga ng mga Barangay, iya ginpahayag nga gintuman sang mga barangay officials ang ila obligasyon halin sa listahanay kag ginpasa naman ini sa Department of Social Welfare and Development (DSWD) Region VI.
Ginpahayag ni Niño nga ang tanan nga ginapanan-aw nga sala sa tagtaganay sang ayuda ang ginplastar man nila sa pagsimapol kaupod ang mga personnel sang ahensya apang natabo sa gihapon ang pagsalangisag.
Mas maayo suno kay Niño nga ipalab-ot sang mga pumuluyo ang ila reklamo sa complaint desks sa payout centers agud ma-refer man sa Department of Social Welfare and Development Region VI.
“SA BAHIN SANG DWSD”
Nagpasalig naman ang talatapan sang Department of Social Welfare and Development Region VI nga tsekyaron sa gilayon ang tanan nga reklamo nga ginapalab-ot may kaangtanan sa tagtaganay sang second tranche sang ayuda sa idalom sang Social Amelioration Program.
Sa interview sang Bombo Radyo kay May Castillo, tagpamaba sang nasambit nga ahensya, iya ginpahayag nga posible nga may yara lang sang typographical error nga natabo.
Madasig lang nga masolbar ang amo nga problema suno sa natungdan ilabi na kun napahibalo man gilayon ang ila talatapan.
Suno pa kay Castillo, wala sang dapat kabalak-an ang mga benepisyaryo ilabi na kun nakahibalo sila nga elegible sila sa amo nga cash aid.
