ILOILO – Posible nga mangin virtual na lang ang patigayunon nga session sang Sangguniang Panlalawigan.
Ini ang kasunod man sang pagpaidalom sa lockdown sang Iloilo Provincial Capitol matapos nagpositibo sa Coronavirus disease 2019 (COVID-19) ang job hire sang General Services Office.
Sa exclusive interview sang Bombo Radyo kay Iloilo Vice Governor Christine Garin, iya ginpahayag nga may pahanugot naman ni Iloilo Governor Arthur Defensor Jr. ang nasambit nga tikang.
Suno kay Garin, gin-athag man sang Provincial Health Office sa ila nga wala sila sang close contact sa nasambit nga job hire nga COVID-19 positive.
Ulihi nga nagsulod sa trabaho ang nasambit nga pasyente sang Lunes sa diin wala man siya naka close contact sa mga katapo sang Sangguniang Panlalawigan.
Nahibaluan nga una na nga nagpaidalom sa real-time reverse transcription polymerase chain reaction (RT-PCR) test ang mga board members kag ila mga empleyado sa diin nagnegatibo ang mga ini sa nasambit nga virus.
Magadepende naman suno sa bise gobernador sa patigayunon nga contact tracing kun bala liwat sila nga magapaidalom sa nasal swab test.
