ILOILO – Napasar na sa Sangguniang Panlalawigan ang ordinansa nga naga-regulate sang pagbakal kag pagbaligya sang makahulubog nga ilimnon sa probinsya sang Iloilo umpisa 9:00 sa gab-i tubtob 4:00 sa kaagahon.
Sa interview sang Bombo Radyo kay Iloilo Second District Board Member Ramon Sullano, iya ginpahayag nga ginsanto ang bag-o nga ordinansa sa ginapatuman nga curfew hours sa probinsya agud labi pa nga madisiplina ang mga tawo.
Sa idalom sang amo nga ordinansa, ginadumilian man ang pag-inom sang makahulubog nga ilimnon sa pampubliko nga lugar, magluwas lang kun may yara sang pahanugot sang alkalde kaangay sa mga religious masses kag wedding ceremonies.
Ginadumilian man ang mga establisemento-komersyal sa pagbaligya sang makahulubog nga ilimnon sa mga menor de edad.
Yari ang penalidad nga atubangon sang mga magalapas:
1st offense – P1,000 nga multa, 1-10 ka adlaw nga pagkapreso ukon depende sa discretion sang Korte;
2nd offense – P2,000 nga multa, 5-15 ka adlaw nga pagkapreso ukon depende sa discretion sang Korte; kag
3rd offense – P5,000 nga multa, 10-20 ka adlaw nga pagkapreso ukon depende sa discretion sang Korte
Kun isa naman ka public official ukon employee ang magalapas sa ordinansya, mahimo siya pasakaan sang administrative sanction.
