ILOILO – Tatlo ang nagdugang sa mga nagpositibo sa COVID-19 sa mga empleyado sang National Irrigation Administration Region 6.
Sa interview sang Bombo Radyo kay Steve Cordero, tagpamaba sang nasambit nga talatapan, iya ginpahayag nga ang tatlo ka COVID-19 positive ang kabahin sang skeleton workforce.
Lunsay asymptomatic ang mga pasyente kag subong nagatinir sa quarantine facility sang Iloilo City, Barotac Viejo, kag probinsya sang Antique.
Tubtob subong, indi pa matumod kun sa diin naghalin ang virus bangud wala man naka-travel ang mga pasyente sa iban nga high-risk nga lugar bangud balay kag opisina lang ang ila ginapadulungan.
Ginkumpirma man sang natungdan nga magapabilin sa lockdown ang talatapan bangud nagapadayon pa ang disinfection.
Padayon ang contact tracing kag nagapadayon man ang pamunuan sa pag-subject sa iban pa nga mga empleyado sa COVID-19 test.
As of August 12, naglab-ot na sa 10 ang COVID-19 cases sa National Irrigation Administration Region 6.
Sa sini nga numero, 8 ang active cases bangud naka-recover na sa balatian ang una nga 2 ka pasyente.
