ILOILO CITY – Nagpositibo sa coronavirus disease 2019 (COVID-19) ang lima ka call center agents sang Business Process Outsourcing (BPO) company nga iQor kag residente sang Sta. Barbara, Iloilo.
Sa interview sang Bombo Radyo kay Mayor Rema Somo, iya ginpahayag nga lunsay asymptomatic ang mga pasyente.
Duha ang naka-home quarantine samtang tatlo naman ang ginpahamtang sa isolation facility.
Ginpahayag ni Somo nga sang nag-abot ang mga call center agents sa ila lugar, nag-aligmat man ang mga opisyal sang barangay rason nga na-isolate ang mga ini kag wala na sang iban pa nga naka-close contact magluwas lang sa ila pamilya.
Ang pamilya sang mga COVID-19 positive ang ginpaidalom man sa istrikto nga home quarantine.
As of August 13, walo na ang kabug-usan nga kaso sang COVID-19 sa banwa sang Sta. Barbara. Ini ang ginalakipan sang 5 ka call center agents sang iQor, isa ka locally stranded individual (LSI), isa ka beautician, kag isa ka non-medical staff nga nagatrabaho sa isa ka pribado nga ospital sa syudad sang Iloilo.
