DUBAI – Paghatag sang maayo nga kabuhi sa iya anak kag pamilya ang nagtulod sa isa ka single mom sa pagtrabaho sa luwas sang pungsod.
Sa interview sang Bombo Radyo kay Tinah Mae Tiñas, tumandok sang Igang, Nueva Valencia, Guimaras kag naga trabaho bilang paralegal sa isa ka law firm sa Dubai, iya ginpahayag nga bangud madamo ang demands sang iya pamilya, gintinguhaan gid niya nga makapadulong sa luwas sa pungsod agud makabaton sang dako nga sweldo.
Suno kay Tiñas, nakaluy-an man nga naka-angkon siya sang mabuot nga employer kag mga kaupod sa trabaho.
Ginpahayag sang natungdan nga nagabaka-baka gid siya sa trabaho agud sa ulihi makasupot siya kag makapauli sa Pilipinas.
Gin-ako man sang natungdan nga nagabatyag man siya sang kasubo bangud nagabatyag siya sang kahidlaw sa iya anak.
Nobyembre pa sang nagligad nga tuig sang ulihi nga nakapauli si Tiñas sa iya balay kag nagalaom nga makabalik sa Pilipinas matapos ang pandemya.
