MANILA – Ginatos ka milyon ka pesos ang makinot sang gobyerno sa tion nga ipatuman na sa masunod nga tuig ang National Broadband Program (NBP).
Suno statement sang Department of Information and Communications Technology, ginalauman nga magalab-ot sa P720 million ang internet subscription expenses sa una nga tuig sang pagpatuman sang nasambit nga programa.
Sa Phase 1, iga-activate ang Cable Landing station sa Baler, Aurora kag ini ang iga-angot sa National Grid Corporation of the Philippines (NGCP) Node sa San Fernando La Union paagi sa Luzon Bypass Infrastructure.
Pagkatapos sini, iga-activate kag iga-light up ang apat ka DICT nodes kag ang 15 ka NGCP nodes nga naga-konekta sa DICT equipment.
Paagi sa National Broadband Program (NBP), ang DICT ang magapahamtang sang broadband capacity sa pungsod ilabi na sa mga malayo kag nabukid nga lugar.
Paagi sa nasambit nga programa, ang government agencies ang maka-angkon sang internet service nga P50 per megabits per second (Mbps) kun ipaanggid sa P350 per Mbps nga internet bandwidth per month.
Kun matigayon, ang average government office ang makagasto lamang sang P5,000 sa kada bulan ukon P60,000 kada tuig.
Katuyu-an sang connect-connect-connect initiative amo nga mapasangkad ang fiber optic cables kag wireless technologies paagi sa masangkad, madasig kag barato nga internet access.
Ang additional budget request sang DICT ang magalab-ot sa P17 billion para sa fiscal year 2021 ang aprobado na kag sa 2022, ang Phase 2 sang National Broadband Program ang maga-cover sa Luzon, Visayas kag Mindanao kag ginalauman nga magalab-ot sa 34 billion pesos ang government Internet expense.
