ILOILO CITY – Liwat nga ginbuhi ang Task Force Alambre sa syudad sang Iloilo agud mahipid kag mahimos ang mga spaghetti wires, telephone kag television cables, kag nagahilay nga mga poste sa mga dalanon sa syudad.
Ini ang may kaangtanan sa Executive Order No. 145 ni Iloilo City Mayor Jerry Treñas.
Sa interview sang Bombo Radyo kay Engineer Randy Pastolero, executive assistant to the Mayor for power, iya ginpahayag nga nagabululigay subong ang mga telecommunications company kag electric distribution company kag ang Iloilo City Government agud masigurado nga mahilway sa katalagman ang mga nagaagi nga mga tawo kag salakyan sa dalanon.
Kada adlaw suno kay Pastolero, may tiglawas halin sa concerned companies nga amo ang nagahimos sa mga electric wires.
Lakip man sa trabaho suno kay Pastolero amo ang pag-retrieve sa inactive drop cables kag wires kag pagkay-o kag pag-re-bundle sang wires kag cables nga nagasangyad sa alagyan.
Gin-athag man sang natungdan nga luyag sang alkalde nga malimpyo ang mga plaza kag mahimos ang nga nagasabad nga mga linya sang kuryente kag mga wala-sa-lugar nga poste.
Ginakalipay man sang opisyal nga magluwas sa ginpasangkad nga manpower, may mga equipment man nga sarang magamit sa syudad.
