Madayon na ang patigayunon ang Dugong Bombo sa Passi City Arena sa Nobyembre 24 kag 27.
Sa interview sang Bombo Radyo kay Passi City Mayor Stephen Palmares, iya ginpahayag nga all set na ang blood letting activity ukon ang Dugong Bombo matapos makapila mapostphone bangud sa pagtaas sang kaso sang COVID-19 sa Passi.
Suno kay Palmares, nagapasalamat gid sila sa Bombo Radyo Iloilo kag Philippine Red Cross bangud sa padayon nga pagpartner sa nasambit nga syudad.
Pahayag sang alkalde, ginahitso man sang gobyerno nga patindugan man sang Philippine Red Cross molecular laboratory ang syudad sang Passi agud maka-angkon sang libre nga swab ukon RT-PCR test ang mga pumuluyo nga nagabusong kag nagamalasakit.
Sa subong ginahulat lamang ang lisense kag permits agud mag-operate ang nasambit nga laboratoryo sa diin magadasig na ang releasing sang swab test kag libre na man ang mass testing.
Ginkalipay man sang natungdan nga sa subong, apat na ka adlaw nga wala na nadugangan ang kaso sang COVID-19 bangud sa ginapabaskog nga pagbuligay kag health protocols sa Passi City.
Samtang, sa pihak sini nagpasalamat man ang alkalde bangud suno sa iya, apisar sang nagakatabo madayon na ang Dugong Bombo sa ila nga syudad, sa diin madamo gid ang mabuligan nga pumuluyo ilabi na sa subong nga pandemya.
