ILOILO – Padayon pa ang imbestigasyon sang Sta. Barbara Municipal Police Station sa rason sang kamatayon sang isa ka lalaki nga nasapwan na lang nga nagalutaw sa suba sa Barangay Cabugao Norte, Sta Barbara, Iloilo.
Ang biktima amo si Renato Sogoan, 84, residente sang Barangay Bagumbayan, Sta. Barbara, Iloilo.
Sa interview sang Bombo Radyo kay Police Major Raymond Celoso, hepe sang Sta. Barbara Municipal Police Station, iya ginpahayag nga may pilas sa tuo nga bahin sang iya ulo ang biktima kag ginabanta 24 ka oras na nga napatay antes nasapwan.
Kagab-i, una na nagreport ang anak sang biktima nga wala nakapauli ang iya amay bangud ginapahayag nagpadulong lang ini sa Poblacion agud magtambong sa fiesta.
May mga alegasyon man nga ulihi nakit-an ang biktima nga nagsakay sa isa ka depampasahero nga tricycle kagab-i, Disyembre 5.
Usisaon pa sang mga pulis kun may yara sang kontra ukon malain nga rekord si Sogoan.
Sa ila inisyal nga imbestigasyon, masabad ang baba sang biktima kun hubog apang posible suno kay Celoso nga bangud ini sa katigulangon.
Ipaidalom pa sa autopsy examination ang bangkay sang biktima.
