OTON, ILOILO – Wala ginadula sang otoridad ang posibilidad nga mga miyembro sang New People’s Army (NPA) ang duha ka senior citizens nga nasapwan nga nagahuray-ad kag wala na sang kabuhi sa sulod sang isa ka balay sa Barangay Botong, Oton, Iloilo.
Matandaan nga sang Sabado, Disyembre 26, sang nasapwan ang duha apang tubtob subong, nagapabilin sila nga unidentified.
Sa interview sang Bombo Radyo kay Pol. Col. Gilbert Gorero, director sang Iloilo Police Provincial Office, iya ginpahayag nga walo ka IDs ang narecover sa crime scene kag duha ka pangalan ang nakit-an: ANTONIO CABANATAN kag PASTOR MACATIMBAG.
Pareho lang ang itsura sa amo nga duha ka pangalan apang nanuhay tuhay man nga address ang nakabutang: may yara nga Panay, Capiz, may Samar, kag may Cebu.
Gina-alegar nga may nakit-an man nga .45 caliber pistol sa crime scene kag flag nga ginapatihan iya sang Communist Party of the Philippines – New People’s Army (CPP-NPA).
May mga subversive documents man nga narecover apang nagpamalibad na si Gorero nga i-detalye kun ano ang sulod sang amo nga mga dokumento.
Indi man makumpirma kun mag-asawa ang duha ka biktima bangud wala sang narecover nga IDs nga makatumod sang identity sang babaye nga biktima nga ginabanta nagaedad 55-60 anyos.
Pati ang paagi sang pagpatay sa duha ang indi pa man matumod sang mga pulis apang sa inisyal nga impormasyon, may agi sang hinigtan sa liog sang mga biktima kag may dugo man nga nakit-an sa kwarto.
Magluwas sa posibilidad nga mga miyembro sang rebelde ang duha ka biktima, ginasundan man sang mga pulis ang mga anggulo nga Robbery with Homicide kag Homicide ukon Murder.
Para sa anggulo nga Robbery with Homicide, kinahanglan pa nga mag-surface ang pamilya sang duha ka biktima agud mahibal-an kun may nadula sa ila nga mga gamit.
Sa subong, nagaapelar ang otoridad sa mga pamilya nga may nadula nga himata nga i-check sa punerarya sa Oton ang duha ka biktima.
Matandaan nga santo sa una nga pagpakig-angot sang Bombo Radyo sa Punong Barangay sang amo nga lugar, wala man sang nakakilala sa amo nga mga biktima.
Ginapahayag nga madugay nga nga ginapaarkilahan ang balay kun sa diin nasapwan ang duha ka tigulang.
