Nagmahal ang presyo sang mga utanon nga ginagamit sa mga salad kag chopsuey.
Sa exclusive interview sang Bombo Radyo kay Engr. Remelyn Recoter, Regional Director sang Department of Agriculture Region 6, iya ginpahayag nga pila sa mga ulutanon ang may yara sang pagsaka sa presyo bangud sa kakulang sa supply sang produkto sa pungsod. .
Lakip diri suno kay Recoter amo ang brocolli, bombay, carrots kag iban pa.
Samtang ang mga panakot naman sang pinakbet ang estable sa gihapon ang presyo.
Ginpaathag ni Recoter nga kun gamay ang suplay sang utan kag magsaka ang demand, posible nga magasaka man ang presyo sini.
Suno kay Recoter, kun magnubo naman ang demand kag magsaka ang suplay, may yara naman sang pagnubo sang presyo.
Nahibaluan nga sa supply kag demand forecast sang Department of Agriculture, may yara lamang sang 78.4 percent nga demand sa ginabakal nga utan nga local kag imported supply.
Buot silingon, may yara sang kakulang sa pila ka mga utan kag oversupply naman sa iban depende sa pananom.
