Maga-withdraw na ang United Arab Emirates sa Organization of the Petroleum Exporting Countries (OPEC) epektibo sa Mayo 1 subong nga tuig.
Suno kay UAE Energy Minister Suhail Mohamed al-Mazrouei, ginhimo ang desisyon matapos ang mahinalungon nga paglantaw sa energy strategies sang regional power.
Gin-ako sang minister nga wala ginpakig-angot sang UAE ang amo nga isyu sa bisan ano nga pungsod kag mangin sa Saudi Arabia nga amo ang leading member sini.
“This is a policy decision, it has been done after a careful look at current and future policies related to level of production,” suno sa energy minister.
Ang OPEC amo ang kartel sang mga dalagku nga mga pungsod nga naga-produce sang langis kag naga-coordinate sang mga polisa sa produksyon agud nga ma-impluwensyahan ang oil supply sa kalibutan kag ang presyuhanay.
Sa statement nga gin-release subong nga adlaw, ginsiling ang UAE nga magabiya man ini sa OPEC+.
Ang ginatumod nga OPEC+ amo naman ang mas daku nga grupo nga ginabug-usan sang mga myembro sang OPEC kag oil-producing allies lakip na ang Russia.
Ang member countries sang OPEC amo ang naga-monitor sang merkado kag naga-desisyon sang tingob kun pasakaan ukon panubuan ang produksyon sang langis agud nga ma-mentenar ang estable nga presyo kag suplay. Ginakinahanglan ang unanimous vote agud nga mapasaka ukon mapanubo ang oil production.
Ang pagbiya sang UAE sa OPEC ang ginalantaw nga daku nga kadulaan sa cartel nga amo ang naga-account sang 36% sang oil production sang kalibutan. Ini man nga cartel ang naga-kontrol sang halos 80% sang kabug-usan nga proven reserves sang kalibutan.
Nahibaluan nga 1960 pa sang gin-establisar ang OPEC paagi sa Saudi Arabia, Iran, Iraq, Venezuela kag Kuwait. Pito ka tuig makaligad sadto, nag-upod man sa ila ang UAE.
Nalakip ang UAE sa ten largest oil producers nga naga-account sang 3% to 4% sang langis sa kalibutan.#
 epektibo sa Mayo 1 subong nga tuig.){kind=link}