Tapuson anay sang banwa sang Pavia ang pagpatigayon sang information dissemination sa tanan nga mga barangay antes mag-survey kun pila sa populasyon sang banwa ang handa nga magpabakuna batok sa COVID-19.
Sa interview sang Bombo Radyo kay Pavia Mayor Luigi Gorriceta, iya ginpahayag nga maathag sa subong nga naunahan sa kakulba kag kahadlok sa vaccination ang mga tawo.
Magluwas sa sala nga mga impormasyon nga ginapatihan gilayon, nangin factor man suno sa alkalde ang lain-lain nga desisyon sang national government may kaangtanan sa vaccination.
Partikular nga gintumod ni Gorriceta ang pabag-o bag-o nga pahayag ni Presidente Rodrigo Duterte kun sa diin siya mapabakuna.
Kuntani suno sa alkalde, confident gid kag masaligan ang national government offcials — ilabi na ang health officials — sa pag-address sang health crisis.
Negatibo man ang reksyon ni Gorriceta sa ‘No Vaccine, No Work’ policy.
