TAPAZ, CAPIZ – Tatlo ka adlaw nga nagabalik-balik sa Barangay Roosevelt, Tapaz, Capiz ang duha ka tawo nga ginapatihan sang pamilya nga may kahilabtanan sa pagluthang-patay kay Punong Barangay Julie Catamin.
Sa interview sang Bombo Radyo kay Elsie Catamin Peñalosa, magulang sang 49 anyos nga biktima, iya ginpahayag nga santo sa panaysayon sang iya bayaw, nagpakilala nga miyembro sang pulis kag militar ang duha ka tawo.
Suno kay Peñalosa, ginpangita sang duha ka ginatumod nga tawo si Catamin bangud gin-alegar nga may yara sila sang ‘session’. Indi man matumod sang pamilya kun ano nga session ang buot silingon sang duha ka tawo bangud wala man sang schedule si Catamin sang amo nga adlaw.
Ginapahayag nga wala nag-abtanay ang duha ka tawo kag si Punong Barangay Catamin bangud Sabado pa lang sang hapon, didto na si Catamin sa Malitbog Ilaya, Bingawan, Iloilo bangud nagapulaw siya sa ila himata nga napatay.
Domingo sang aga pinakaulihi nga nagpakita sa Roosevelt, Tapaz ang duha ka tawo kag sa amo man nga adlaw, naluthangan-patay si Catamin sa Malitbog Centro, Calinog, Iloilo sang mapauli na kuntani siya halin sa namatyan.
Suno kay Peñalosa, ginalikawan nila nga magpamilya nga maglukso sa konklusyon kun sin-o matuod ang nagpatay sa ila utod ‘bangud indi man sila gusto mabalikan kag mabalusan.’
Apang gintuad ni Peñalosa nga ‘star witness’ si Catamin sa hearing may kaangtanan sa kontrobersyal nga Disyembre 30 nga police operation sa Tapaz, Capiz kun sa diin patay ang 9 ka mga ginatudlo miyembro sang New People’s Army.
SIN-O SI KAP JULIE?
Si Punong Barangay Catamin ukon si Kap Julie ang isa sa hugot nga nagpakamalaot sa mga pulis sa natabo nga Disyembre 30 nga operasyon sa Tapaz, Capiz. Sa amo nga operasyon, apat ka mga residente sang iya barangay ang gin-aresto.
Nagpanindugan si Catamin nga lunsay PLANTED ang firearms kag explosives nga narecover sa possession sang iya mga residente. Sa iya Facebook post sa amo nga adlaw, ginpahayag ni Catamin nga: “They were arrested and handcuffed. Bullets and firearms were planted and their houses were destroyed. Where is justice? I am appealing for help from any government agency that can help me.”
SUNO NAMAN SA MILITAR KAG PULIS
Indi pa maathag kun matuod nga star witness si Catamin sa hearing sa amo nga police operation.
Sa bahin sang militar, hugot nga ginkondenar sang 301st Infantry Brigade (301Bde) sang Philippine Army ang pagpatay kay Catamin nga amo ang ila ginpahayag ‘isa sa ila peace advocates’ sa Tapaz, Capiz.
Ginpahayag sang militar nga sa idalom sang pagpamuno ni Catamin, gindeklarar sang Barangay Roosevelt ang CPP-NPA bilang Persona Non Grata sang Setyembre 15, 2020.
Suno pa sa official statement sang 301Bde, nadulaan sila sang ‘peace advocate’ kag ‘ally’.
Ini nga pahayag ang ginsuportahan man sang Police Regional Office VI, santo sa interview sang Bombo Radyo kay Police Lt. Col. Joem Malong, spokesperson sang PRO VI.
PADAYON PA ANG IMBESTIGASYON
Una naman ginpahayag ni Police Lt. Jorge Lenantud, deputy Chief of Police sang Calinog Municipal Police Station nga nagapadayon pa subong ang imbestigasyon sang otoridad.
Apat ka empty shells sang .45 caliber pistol ang narecover sang pulis sa crime scene samtang narecover man sang Scene of the Crime Operation (SOCO) ang isa ka bala sang .45 caliber pistol nga wala naglupok.
Duha ka suspek ang ginapangita sang mga otoridad nga amo ang ginatudlo nagpangamot sa krimen.
Sa subong, nagpahayag man ang pamilya nga wala pa napaidalom sa autopsy examination ang bangkay sang punong barangay bangud wala sila sang inugbayad nga P20,000.
KINDLY CLICK THE LINK TO READ RELATED STORY: https://www.facebook.com/1054610584577797/posts/4036623569709802/
