ILOILO CITY- Malapit na sa critical level ang sitwasyon sang mga district hospitals sa Probinsya sang Iloilo bangod sa nagataas nga kaso sang COVID-19.
Sa interview sang Bombo Radyo kay Iloilo Governor Arthur Defensor Jr., iya ginpahayag nga sa subong, ang mga temporary treatment kag monitoring facilities amo ang nagasustiner sa pagkinahanglan sa mga hiligdaan sang mga pasyente nga nagapositibo sa COVID-19.
Suno sa gobernador, padayon man nga ginadevelop sang mga alkalde sa kabanwahanan ang ila lugar agud maatender sang maayo ang mga pasyente.
Pahayag niya, naghire man ang probinsya sang 36 nurses, 16 attendants kag mga technicians agud madugangan ang pwersa sang mga medical personnel sa mga quarantine facilities, district kag tertiary hospitals sa Iloilo.
Samtang, may kaangtanan naman sa highest single-day record nga 211 cases kahapon nga adlaw sa probinsya apisar nga ginapatuman na ang hugot nga border control, ginpahayag sang opisyal nga indi dapat matingala ang pumuluyo.
Suno sa natungdan, sa masunod nga duha ka semana pa makit-an ang epekto sang pagpatuman sang border control bangud may yara pa sang on- going transmission sa Iloilo.
