Temporaryo nga gin-lockdown ang simbahan sa Pototan, Iloilo matapos nagpositibo sa COVID-19 si Reverend Msgr. Rolando Haguisan, parish priest sang Patronage of Saint Joseph Parish.
Sa interview sang Bombo Radyo kay Rev. Fr. Angelo Colada, director sang Social Communications sang Archdiocese of Jaro, iya ginpahayag nga ginahibalo pa sang health authority kun paano na-infect sang virus si Haguisan.
Nagapadayon man suno kay Colada ang contact tracing sa mga naka-close contact sang pari.
Gilayon man nga ginpatigayon ang disinfection sa lugar kag ginpaidalom sa swab test ang mga personnel sa simbahan.
Ginpahayag man ni Colada nga magluwas kay Haguisan, may tatlo ka iban pa nga pari sa Archdiocese of Jaro nga nagpositibo man sa amo nga balatian.
Nagsaka na subong sa siyam ang numero sang mga parish priests sa nasambit nga archdiocese ang na-infect sang virus.
Una diri, may lima nga una nga gin-anunsyar nga natapikan sang COVID-19 kun sa diin duha ang assigned sa Sara, isa sa Bingawan, kag duha ang retired na.
Kalabanan sa sini nga mga pari ang manugtapos naman sa ila nga mandatory quarantine.
