ILOILO CITY – Nagrason ang Medicus Diagnostic Center-Lapaz nga nadisinfect man nila ang nagamit na nga mga SARS-COV-2 Rapid Antigen Test Kits antes ginbilin sa gwa sang ila establisyemento.
Santo sa nangin paathag sang diagnostic center sang ginpatawag ni Iloilo City Mayor Jerry Treñas kahapon, Hulyo 12, nalipatan lang nga kuhaon sang assigned personnel ang amo nga infectious waste.
Kun balik-balikan, ini nga mga used test kits amo ang ginpangpulot sang mag-asawa nga basurero kag ginplano kuntani nga ibaligya apang bangud indi man mabaton sa kiluhan, gintampok na lang ang test kits sa dalan sa Barangay San Vicente, Jaro, Iloilo City.
Masobra 100 ang amo nga rapid test kits kag sang gin-trace sang Jaro Police Station, nakit-an nga may nabilin pa nga test kits sa gwa sang Medicus Diagnostic Center.
Sa interview sang Bombo Radyo kay Mr. Jeck Conlu, spokesperson sang COVID-19 team sang syudad, iya ginpahayag nga ginhatagan sang isa ka semana ang amo nga diagnostic center agud nga maplastar ang ila nga protocol nga ginasunod sa pag-dispose sa sini nga mga basura.
Kun indi ma-comply, ipasirado ang establisyemento.
Dapat suno kay Conlu nga bisan na-disinfect na ang test kits, taguon gid ini sa isa ka separado nga facility bangud infectious ini kag nagaunod sang discharges sang tawo.
Lain nga basurero ang assigned sa pagkuha sang amo nga test kits kag lain man nga plastic ang dapat butangan sang infectious waste.
Indi naman magpasaka sang kaso ang COVID-19 team sa mag-asawa nga basurero nga nagbilin sang test kits sa San Vicente, Jaro.
Suno kay Conlu, indi na pagpadalman ang mag-asawa bangud pigado man ang mga ini kag wala gid sang ideya nga infectious waste ang ila nga nakuha nga basura.
Una naman nga nagpahayag ang Jaro Police Station nga indi man magpasaka sang reklamo sa amo nga mag-asawa bangud kulang gid ini sa ihibalo kun ano ang SARS-COV-2 Rapid Antigen Test Kits.
