Nadakpan sang pulis kag militar ang ginapahayag duha ka katapo sang New People’s Army (NPA) sa Brgy. Cahigon, Calinog, Iloilo.
Ginapahayag katapo sang Central Front-Komiteng Rehiyon-Panay ang duha kag nagaserbe bilang “medic” sang ila nga grupo.
Indi pa makumpirma sang otoridad kun ano gid ang ila relasyon sa isa kag isa.
Sa interview sang Bombo Radyo kay 3rd Infantry Division-Philippine Army spokesperson Captain Kim Apitong, iya ginpahayag nga ginkasa ang operasyon kasunod sang nabaton nga intelligence information nga may presensya sang Communist Party of the Philippines(CPP)-NPA sa amo nga lugar.
Nakit-an ang duha nga nagasakay sa motorsiklo. Sunod nga nagpalagyo ang mga ini apang nadakpan sa ginpatigayon nga hot pursuit operation.
Na-recover ang isa ka homemade M16 pistol, duha ka rifle grenades, isa ka hand grenade, tatlo ka bala sang M16, assorted medical supplies, cellphone, kag mga ID.
Yara ang duha sa kustodiya sang Calinog Municipal Police Station.
