‘Moral turpitude, indi isyu sa DQ cases batok kay Bongbong Marcos; pagkalkal kun bala covered si BBM sang PD 1994 amo ang dapat nga kwestyunon agud ma-determinar kun pwede nga madagdag ang penalidad nga perpetual disqualification from holding public office’ — Former BIR Commissioner Kim Henares

Daw kaangay nga ginapa-kumplikar lang sang mga petitioners ang ila nga kaso nga gina-file batok kay presidential candidate Ferdinand ‘Bongbong’ Marcos, Jr. bangud sa pag-insister sang krimen nga naga-involve sang moral turpitude.

Sa interview sang Bombo Radyo kay former Bureau of Internal Revenue (BIR) Commissioner Atty. Kim Jacinto- Henares, iya ginpahayag nga ang pinaka-simple nga isyu nga dapat lagson kay Marcos amo ang pamangkot kun bala nadalasa ini sang Section 286 sang Presidential Decree No. 1994 ukon ang “Amended National Internal Revenue Code.”

Sa sini nga section, nakasaad nga may perpetual disqualification nga penalidad batok sa public officials nga na-convict bangud sang tax offenses.

Si Marcos ang covicted sa kaso nga failure sa pag-file sang income tax returns halin sang 1982 tubtub sa 1985.

Ang PD 1994 naman ang nag-take effect sang Enero 1, 1986.

Sang amo nga tion, naga-serbe si Marcos nga gobernador sang Ilocos Norte apang ginbayaan sini ang amo nga posisyon bangud nagbiya ang mga Marcos sa Pilipinas sang Pebrero 1986 bangud sang People Power Revolution sang Pebrero 25.

Suno kay Henares, kun public official ang isa ka tawo kag na-convict sa paglapas sa bisan ano nga probisyon sa tax code, dapat na ini nga permanente nga i-disqualify sa pag-hold sang public office amo man sa pagboto.

Irrelevant na suno sa iya ang isyu sang moral turpitude.

SANDIG SA RULING SANG COMELEC

Ang gin-raise nga isyu ni Henares ang nasabat na sang ginpa-guwa sang Second Division sang Comelec ang ruling sa isa ka disqualification case batok kay Marcos.

Gin-dismiss sang Second Division ang amo nga kaso bangud ginpahayag nga indi covered sang Section 286 sang PD 1994 si Marcos; buot silingon, wala sang penalty of perpetual disqualification.

Ini bangud suno sa ruling sang second division, Enero 1, 1986 nag-take effect ang PD 1994, apang indi na public officer si Marcos sang Marso 18, 1986— ang petsa kun san-o kuntani natalana nga mag-file ini sang iya nga income tax returns para sa tuig 1985.

Ginpahayag sang Comelec nga indi applied kay Marcos ang amo nga penalidad.

DESISYON SANG KORTE SUPREMA

Gina-insister gid ni Atty. Henares nga indi ini isyu sa moral turpitude kundi isyu kun may covered pa si Marcos sang paglapas sa PD 1994 sang wala ini naka-file sang income tax returns sang 1986.

Bangud dismissed na ang tatlo ka DQ cases batok kay Marcos sa first division sang Comelec, may kinamatarong ang mga petitioners nga i-apelar sa Comelec en banc ang amo nga mga kaso. Kun amo man sa gihapon ang mangin ruling kag kun magpursige gid ang mga petitioners, pwede pa ini nga ipasaka sa Korte Suprema para sa pinal nga desisyon. ##