ILOILO CITY – Nagpaidalom sa surgery ang isa sa mga vocalist sang BTS nga si Kim Seokjin ukon ang mas kilala sa pangalan nga “Jin” bangud sang naagum nga finger injury.
Suno sa BigHit Music nga entertainment company ni Jin, nakaagum sang injury ang vocalist sa iya index finger samtang naga ubra sang iya daily activities kag gindala sa emergency room para sa nagakaigo nga pagbulong.
Ang bahin sang tudlo ni Jin ang nakaagum sang partial damage kag kinahanglan nga ma-operahan agud nga ma-repair ang extensor.
Nagpasalig naman nag mga doctor nga nagmadinalag-on ang treatment kag na-discharge na sa ospital si Jin.
Samtang nagapadayon ang treatment, kinahanglan ni Jin nga magsuksok sang cast kag magabalik lang sa iya mga aktibidad sa tion nga mag ayo na ini.
Ang grupo nga BTS ang natalana nga magpadulong sa US para sa ila apat ka adlaw nga in-person concert.
Natalana man nga mag-perform ang grupo sa 64th Grammy Awards kun sa diin, sila ang nominado sa Best Pop Duo/Group Performance.
