ILOILO CITY – Ginapanan-aw sang Malacañang nga yara na sa “new normal” ang pungsod Pilipinas kag matapos na ang vaccination rollout kadungan sang pagtakop sang Duterte administration.
Suno kay Undersecretary Kristian Ablan, ginalauman sang Department of Health (DOH) nga ang kaso sang COVID-19 sa isa ka aadlaw ang maganubo tubtob sa 70 sa katapusan sang bulan sang Abril kun padayunon ang pagsunod sa minimum health standards.
Suno kay Ablan, ginatinguhaan man sang gobyerno nga malab-ot ang 100% vaccination antes magpanaog sa pwesto si Duterte sa Hunyo 30.
Sang Marso 24, ginpahayag sang independent monitoring group nga OCTA Research nga ang Pilipinas ang nagapabilin sa “very low risk” category sang COVID-19.
Ginpaidalom sang National Inter-Agency Task Force on Emerging Infectious Diseases ang nagkalain-lain nga lugar sa Pilipinas sa sa Alert Level 1 kag Alert Level 2.
