Padayon pa nga ginapangita sang mga pulis ang duha ka lalaki nga naghold-up kag nag-utod sang dila sang isa ka taxi driver sa Barangay Pitalo, San Fernando, Cebu.
Ang biktima amo si Andres Alfanta, 52, residente sang Barangay Cantao-an, City of Naga, kag empleyado sang Hadjie Taxi Cabs.
Suno sa pulis, pauli na kuntani si Alfanta sang kaagahon apang ginparahan ini sang duha ka lalaki sa Banawa, Barangay Guadalupe, Cebu City.
Nagpahayag ang mga suspek nga magapadulong sila sa San Fernando. Bangud malapit lang ang San Fernando sa iya puluy-an, nagpasugot ang driver.
Pag-abot sa Barangay Pitalo sa San Fernando, ginpapundo na sang duha ka lalaki ang taxi. Nagkuha ang mga ini sang pusil kag kutsilyo, kag ginmanduan ang driver nga imaneho ang taxi padulong sa maligwin nga lugar sa tunga-tunga sang Barangay Pitalo kag sa town proper.
Pag-abot sa area, gilayon nga ginkuha sang duha ang P4,200 nga amo ang kita sang driver sang amo nga adlaw.
Antes naglakat, wala pa nakuntento ang duha, ginkuga pa si Alfanta kag gin-utod ang dila.
Sandig sa Facebook post sang anak sang biktima, ginapahayag nga nag-drive ang iya amay padulong sa pribado nga ospital sa City of Naga apang wala siya gin-admit. Natigayon ini nga mabulong sa Cebu South Medical Center sa Talisay City.
Nagaapelar ang pamilya sa pulis nga solbaron gilayon ang kaso kag arestuhon gid ang mga responsable sa krimen.
Suno naman kay San Fernando police investigator Cpl. Mario Paul Pino, nagapakig-angot na sila sa Cebu City Police Station agud nga ma-solbar ang kaso.
Ginahulat pa nga mag-ayo ang pilas ni Alfanta agud nga makuhaan ini sang testimoniya. ## — with reports from Sunstar Cebu and Cebu Daily News
